تاریخ اور جھوٹ

ایک دفعہ کا ذکر ہے کہ ایک بستی میں دو بھائی رہتے تھے۔ والدین کی وفات کے بعد دونوں بھائیوں نے کچھ بات چیت کے بعد جائیداد کو تقسیم کر لیا اور الگ الگ ہنسی خوشی رہنے لگے۔ کئی دہائیوں کے بعد ان کے بچے والدین سے سوال کرتے کہ آپ دونوں الگ کیوں ہوئے۔ اس پہ ان کو جواب ملتا کہ ہم نے سوچا کہ اکٹھے رہیں گے تو جھگڑے بڑھیں گے، خواہ مخواہ کی چخ چخ ہو گی۔ تو بہتر ہے کہ الگ الگ رہ لیں۔

دوسری دفعہ کا ذکر ہے کہ
ایک اور بستی میں دو بھائی تھے۔ والدین کی وفات کے بعد ایک نے علیحدہ ہونے کا مطالبہ کیا۔ دوسرے کے نہ ماننے پہ شدید لڑائی جھگڑا ہوا اور بحالتِ مجبوری جائیداد کا بٹوارہ تو ہو گیا۔ لیکن چونکہ باہمی رضامندی سے نہ ہوئی تھی تو بٹوارے کے بعد بھی عدالتوں میں کیس چلتے رہے۔ کئی دہائیوں بعد جب ایک کے بچے پوچھتے کہ آپ الگ کیوں ہوئے تھے، تو ان کو جواب ملتا کہ دوسرا بھائی نماز نہیں پڑھتا تھا، روزے بھی نہیں رکھتا تھا۔ اس لئے میں نے بٹوارہ کر لیا تا کہ اپنی عبادات سکون سے کر سکوں۔

کچھ ایسا ہی حال ہمارے ساتھ من حیث القوم بھی ہو گیا ہے۔ الگ ملک کی خواہش کرنا اور الگ ملک حاصل کر لینا ایک بہت اچھی بات اور اہم کارنامہ ضرور ہے، لیکن اس کے لئے جس نعرے کو بنیاد بنایا، اس نے ساری تاریخ کا بیڑا غرق کر دیا۔ اس نے مجبور کر دیا کہ تاریخ کو مسخ کر دیا جائے اور مجبوراً بہت سے جھوٹ بولے بلکہ ببانگِ دہل بولے جائیں۔

آج آپ مجبور ہیں کہ بھگت سنگھ کا نام بھی نہ لیا جائے۔ کورس کو کیا، اخباروں اور کالموں میں بھی اس کا ذکر نہ کیا جائے۔ کوئی یہ تسلیم کرنے کو بھی تیار نہیں کہ اس نے بھی ہمارے لئے جان دی تھی۔ وہ بھی ہماری ہی آزادی کا سپاہی تھا۔

برِ صغیر کی تاریخ میں اس کے اپنے پیداکردہ لیڈرز کم کم ہی ملتے ہیں۔ سب امپورٹڈ مال دکھائی دیتا ہے جیسے غزنوی، غوری، مغل وغیرہ۔ تاریخ کو کھنگالا جائے تو دو ایسے حکمرانوں کا نام سامنے آتا ہے جو اپنے دور کے بہترین منتظم اور بہادر حکمران تھے۔ راجہ پورس، جس نے سکندر کو شکست دی اور راجہ رنجیت سنگھ۔ آج ہم مجبور ہیں کہ ان کا ذکر کریں بھی تو تضحیک اور تحقیر کے ساتھ۔ سچ کو سامنے نہ لانا ایک مجبوری بن گیا ہے۔

سوائے غالب، میر اور مزید چند ناموں کے بے شمار اردو شعرا اور ادیبوں کو ہمارے کورس میں کہیں جگہ بھی نہیں مل پاتی، کیونکہ وہ بھارت میں تھے یا بھارت میں ہیں مثلاً کیفی اعظمی، علی سردار جعفری، حسرت جے پوری، عصمت چغتائی وغیرہ۔ جبکہ یہ سب ہندی کے شاعر نہیں تھے، بلکہ اردو کے تھے جو کہ سو کالڈ مسلمانوں کی زبان بتائی جاتی ہے۔

بچے پوچھتے ہیں پاکستان کیوں بنایا تھا، جواب ملتا ہے کہ اسلام کے نام پہ۔ اگر ہمت کر کے کوئی پوچھ لے کہ پھر اسلام رہ کہاں گیا، دکھائی کیوں نہیں دیتا تو اس پہ جواب میں یا چپ ملتی ہے یا ڈانٹ۔

یقین جانئے! اپنی نسلوں سے سچ کو چھپا کے اور جھوٹوں بھری تاریخیں بتا سنا کے کچھ فائدہ نہیں ہونے والا۔ اس کا نقصان ہی نقصان ہے۔ کیونکہ جہاں سوال اٹھ گیا، جواب میں صرف چپ ہی سادھنی پڑے گی۔